【全港親子行山悠遊樂】 第二十集 - 走進郊野 千島湖行山樂

【全港親子行山悠遊樂】 第二十集 - 走進郊野 千島湖行山樂

走進郊野 千島湖行山樂

平時行開山嘅朋友,如果想搵翻啲對小朋友嚟講有少少挑戰性嘅行山路線,今次Jollymap有好介紹,位於屯門嘅大欖涌水塘,有香港千島湖之稱。今次嘅路線喺由楊家村行過去掃管笏村,沿途有兩個水塘靚景睇之餘,又可以行下啲特別啲嘅黃泥路,同小朋友一齊行都唔怕悶親佢哋。

 

楊家村到千島湖行山路線

以黃泥墩村村公所旁邊嘅避雨亭作為起點,大家都可以喺到去洗手間先再出發。由於路途上冇補給站,家長要準備好食物同水先門啦。喺避雨亭,走過河嘅對面,左轉行入去。

沿住河邊行,直到見到呢條小橋,過橋之後就右轉。

感受田園氣息

行多5分鐘就會見到啲古色古香嘅村屋同農田,喺呢個分岔口右轉。

行大概10分鐘,就去到今次行山徑嘅入口啦,喺前段路只要跟住黃泥墩嘅指示行就可以嫁啦。

黃泥路開揚路段

行上樓梯之後嘅路段會比較開揚,所以記得要做好防曬措施啦,亦都要多啲補充水份。

之後就會去到一段黃甘甘嘅路,雖然呢段路冇特別修整過,但喺都唔難行,對小朋友嚟講都喺一個唔錯嘅新嘗試嚟嘅。

繼續上山就會去到一個鐵塔下嘅休息站,大家可以休息翻陣,食下野,補充翻體力,鐘意嘅話亦可以同鐵塔嚟翻張合照。

休息完,一直沿黃泥墩水塘方向行。行嘅時候不妨停低一陣,回頭睇下身後面嘅風景,增加行上山路嘅樂趣,都更容易鼓勵小朋友堅持落去。

黃泥墩水塘靚景

行多20分鐘就去到黃泥墩水塘,家長可以同小朋友落嚟睇下呢個咁平靜嘅水塘,藍天白雲反映喺碧綠嘅水面,靜靜咁欣賞,都會撫平咗我哋日常生活嘅躁動。仲可以睇睇壩下嘅風景,同小朋友一齊搵下頭先行上嚟嘅路,等小朋友獲得成功感。

睇完靚景,走嘅時候記得唔好行咗去壩嘅另一邊,因為過咗水壩就去唔到千島湖啦。行翻去樓梯位右轉向掃管灘方向行。沿住黃泥水塘側邊行,睇翻出去水塘都好靚嫁,仲可以用唔到角度睇到個水塘景,睇嘅野仲多咗添。家長仲可以教育小朋友要從多角度思考,咁樣諗到嘅野都會更加多。

千島湖景色

之後嘅路樹蔭就會多翻啲,而且斜度都冇咁大,行起上嚟都會舒服啲,大概20分鐘就會去到分岔口,喺到可以睇到千島湖嘅靚景。放眼睇出去,一個個大大小小,唔同形狀、長滿綠樹嘅小島,被碧綠嘅塘水環抱住,真喺好有詩情畫意,家長仲可以同小朋友喺到朗誦翻首詠鵝。有需要嘅話可以去一去旁邊嘅流動洗手間。

繼續沿住掃管灘方向落山,行大概10分鐘,喺左手邊就會見到一個比較隱蔽嘅位,行入去就可以用另一角度近距離咁欣賞千島湖,大家都可以喺樹蔭下休息翻陣。喺呢個咁舒適嘅環境下,家長亦不妨同小朋友一齊睇翻本繪本,對住個靚景睇,睇都睇得入神啲。

休息完,一直向掃管灘方向落山,只要一路跟住條寬闊嘅石屎路行,大概30分鐘去到掃管笏村,然後就可以搭43號小巴離開。

大棠楊家村交通資訊

大家可以喺朗屏西鐵站B2出口,行去落去媽橫路威記單車出面嘅巴士站,搭K66去到總站落車,出嚟就喺黃泥墩村避雨亭。

其他資料

長度:約6.5公里

時間:約4小時

199評論

回覆

* 名稱:
* 電郵: (不公開)
* 評論: